બાળ ગીતો

સાગરમાં નાવ મારી સરરર જાય,
કાંઠે ઉભા ઝાડ કેવા નાના નાના થાય. . .
સાગરમાં નાવ મારી. . .

દૂર દૂર પંખીઓનો કલરવ થાય,
સમીરની મંદ મંદ વાંસલડી વાય. . .
સાગરમાં નાવ મારી. . .

સફેદ સઢમાં કેવો પવન ભરાય,
હલેસું મારુંને નાવ દોડી દોડી જાય. . .
સાગરમાં નાવ મારી. . .

ઉંચે ભૂરું આકાશ શું વિશાળ જણાય,
નીચે કાળા કાળા પાણી દેખ્યાં નવ જાય. . .
સાગરમાં નાવ મારી. . .

તોફાનમાં નાવ મારી ડગુમગુ થાય,
પ્રભુને સ્મરું તો નાવ સરરર જાય. . .
સાગરમાં નાવ મારી. . .

ચકીબહેન ચકીબહેન મારી સાથે રમવા
આવશો કે નહીં ? આવશો કે નહીં ?

બેસવાને પાટલો, સૂવાને ખાટલો,
ઓઢવાને પીંછા આપીશ તને, હું આપીશ તને. . .
ચકીબહેન ચકીબહેન. . .

પહેરવાને સાડી, મોર પીંછા વાળી,
ઘમ્મરીયો ઘાઘરો આપીશ તને, હું આપીશ તને. . .
ચકીબહેન ચકીબહેન. . .

ચક ચક ચણજો, ચીંચીં...ચીંચીં... કરજો,
ચણવાને દાન આપીશ તને, હું આપીશ તને. . .
ચકીબહેન ચકીબહેન. . .

બા નહીં લડશે, બાપુ નહીં વઢશે,
નાનો બાબો તો ઊંઘી ગયો, રે ઊંઘી ગયો. . .
ચકીબહેન ચકીબહેન. . .

સાયકલ મારી સ..ર..ર..ર.. જાય,
ટીન ટીન ટોકરી બજાવતી જાય. .
સાયકલ મારી સ..ર..ર..ર.. જાય. . .

શેઠભાઈ શેઠભાઈ આઘા ખસો,
આઘા ખસો નહીં તો પડી જશો,
શેઠભાઈ શેઠભાઈ ચાલ્યા તે ક્યાં ? ?
ચોપડા લઈને ચાલ્યા તે ક્યાં ? ?
સાયકલ મારી સ..ર..ર..ર.. જાય. . .

ડોશીમા ડોશીમા આઘા ખસો,
બાકી રહ્યા મારે ગણા કામો,
ડોશીમા ડોશીમા ચાલ્યા તે ક્યાં ? ?
છીંકણી સુંઘતા ચાલ્યા તે ક્યાં ? ?
સાયકલ મારી સ..ર..ર..ર.. જાય. . .

શેઠાણી શેઠાણી આઘા ખસો,
આઘા ખસો નહીં તો પડી જશો,
શેઠાણી શેઠાણી ચાલ્યા તે ક્યાં ? ?
છત્રી લઈને ચાલ્યા તે ક્યાં ? ?
સાયકલ મારી સ..ર..ર..ર.. જાય. . .